احلي كوسه

طبعاً اتعودنا كلنا نقول كلمة (كوسة)



علي اي حاجة بتيجي كدة لأي إنسان من غير ميكون ليه فيها حق



..وفي غيره احق بها منه ..وياما كتير منا اتعذب بسبب موقف في حياته زي ده



أو (هيتعذب) لسة !!وده بقي كله ممكن يبقي بسبب (الكوسة).. او يعني الوسطة !!بس احنا من أول ماتولدنا واحنا بنسمع الكلمة دي !!



وبقينا نقولها من غير محد يفكر اشمعني (الكوسة) يعني ؟؟



..ليه مختاروش اي حاجة تانية (خيار - بطاطس - بصل)..



!!اشمعني ؟؟؟؟!!!!!انا هقولكوا ...
كان يامكان ايام زمان



..احد الولاة العثمانيين (لاأذكر أسمه بالتحديد) ..اول لما مسك الحكم عمل سور كبير شبه دائري حول مدينة ما ..وكان لهذا السور باب ضخم كبيررررر .. يحرسه حُررراس أقوياء البنية ... بس الوالي ده بقي منع



ان اي بائع يبيع اي خضار داخل حرم تلك المدينة غير الكوسة



علشان هو كان بيحبها جداااااً !!



وبالتالي كان كل يوم لما يُمنع حد من الدخول من تجار الخضار



ويكون بجانبة ِ بائع (الكوسة) يمر من الباب من غير اي تعب ولا حاجة .



.يقوم قايله اه ياعم مهي (كوسة) !!



ودى كانت بداية الكوسة



اقصد بداية ارتباط الكوسة بمعنى كلمة الكوسة فى قاموس الشارع المصرى



نبدا موضوعنا بالنزول للشارع المصرى ومعرفة راى بعض افراد المجتمع المصرى فى الكوسة

اول لقاء مع احد شبابنا خيرة شباب بولاق ابو العلا وكان لنا معه هذا اللقاء

صباح الخير ... ياصباح الهنا ياكبير .. نتعرف بيك .. اخوك الصغير حمادة كلاى .. حمادة موضوعنا انهاردة عن الكوسة عايزيين نعرف رايك فيها .. ياابو الشباب كوسه ايه وبطاطس ايه كلمنى على اللحمه الفراخ الحاجات البنشوفها من العيد للعيد دى .. لا ياحمادة فهمتنى غلط انا بتكلم على الواسطة الهى بنسميها فى بلدنا (كوسة) .. اهااا قصدك الكوسة الهى الكوسة دى بتاعه ابرز تنجز ياباشا على راى الفنان رضا البحراوى معاك فلوس تدوس .. واضح انك متاثر اوى هل فيه حاجة معينه حصلت معاك وصلتك للمرحلة دى .. بص انت مش غريب انا هقولك على الحصلى الباشا امين شرطة القسم حب يشغلنى مرشد بعد ما توبت توبه نصوحة والحمد لله لكن انا رفضت انا ارشد على اصحابى انا حمادة كلاى اللى المنطقة كلها بتحلف بحياتى ارشد على صحابى لا ممكن ابداً .. وعملك ايه حضرة اليوس باشا امين القسم .. خدنى ياباشا واتروقت فى القسم اخر تروقيه .. وعملت ايه بعدها .. ارشدت ياباشا عنهم هما كانوا من بقيت اهلى يعنى ما هما عيال صيع ويستهلوا برضه بقولك ايه باباشا معكش سجارة عشان اخوك خمران من الصبح

وفى لقاء اخر مع احد سيدات المجتمع

ياصباح البتغنى ياحاجة .. اهه صباح يابنى زى اى صباح .. نتعرف بيكى ياحاجة .. خلتك ام السيد .. ماشى ياخلتى ام السيد تعرفى ايه عن الكوسة ياحاجة .. الكوسة الله يجازى شيطانك ياواد فكرتنى بالمرحوم ربنا يقحمه ويقحم ايامه فى يوم من بتوع زمان دول وكنت لابسه العبايه البمبى وعملاله حله كوسه انما ايه ياولا تاكل صوابعك وراها وداخله عليه بالحله لقيته شافنى سورق وقع وخبره طلع فى ساعتها .. اعذرينى ياحاجة فكرتك بالمرحوم وعملتى ايه ياحاجة ساعتها .. بعت الواد سيد جابنا حته جبنه قديمه وبيضتين وكان فيه ربع بطيخه عندنا فى التلاجه وقضناها .. ياحاجه والمرحوم .. مرحوم مين ياواد افتكرلنا حاجه عدله هو ده كان يتعاشر .. ماشى ياحاجة خلاص اسكتى ربنا ياخدك .. بتقول ايه ياابنى .. لا ياحاجه بشكر فيكى بس انا ياحاجة اقصد الكوسة الهى بتاعه الناس البتاخد حاجه متستهلهاش .. اها يابنى والنبى لتكلملنا حد من المسئولين يشوفلنا حل فى صاحب الفرن التحتينا ده تبقى واقف فى طابور العيش بقالك 6 ساعات وتلاقى الناس داخلة من جنبك تقوله افتح ياعوض ويفتح عوض يقوله مين ده يقوله اخو صاحب الفرن والتانى وراه يقولك دول اصحاب ابن صاحب الفرن والغريب تلاقى الخارج مكرمش 2 جنيه ويرزعهم فى جيب عوض الورا .. وانتى ياحاجة مبتعمليش زيهم كده ليه .. يابنى وانا لاقيه اكل ده الواد سيد حتى من ساعه ما اشتغل ومحدش بيشوفه وبطل يسال عليا الواطى .. ما شاء الله ما شاء الله واشتغل ايه سيد .. عقبال اولادك تاجر مخدرات اد الدنيا وربنا وسعها عليه من وسع بس نسينى ابن الموكوسه .. موكوسه دى فيها كوسة برضه ياحاجة .. امشى ياض اطلع بره انت والكوسه بتاعتك دى وجعت دماغى

*****

طبعاً اكيد الكوسة ليها تاثير فى كل واحد فينا سواء تاثير سلبى او ايجابى


العايزيين نوصله هنا هل مجتمعنا ينفع يتعاش فيه من غير كوسة طب هل احنا الغلط ولا هم؟ وهل مراية الكوسة عامية ؟ اللي يعرف يبرز ينجز ويقول يلا نفسى ؟





شعار الموضوع



لو كان نهر النيل يفيض صلصه :.: ما كفا ما عندنا من كوسه
فـحـمـد الله عـلـي انـه مــيـــاه :.: وإلا كان زمانا في حوسه

كوسة نحشيها رز وناكلها بس انا ما بحبهاش كوسه كوسه

بجد موضوع رائع ياهدير وسردك للاحداث زى العسل تسلمى

ههههههههههههههههههههههههههههههههههه




جميل قوي هدير

انا كمان عانيت من الكوسة

ياريت تكتبي الاسم عشان اعرفك

شكرا

تسلمي جامد بس مش بحب الكوسه اصلاااااااااااااااااااا

وهى الحياه فى الدنيا ماشية من غير كوسة

هي الكوسة بقت منتشرة في مصر كثير قوى مع انهم حطولها كيماوى وموضوع هااااااااااااااااائل

صدق اللى قااااااااااااااال
لو نيلك يا مصر صلصة ميكفيش الكوسه اللى فيكى

يسلمووووووووووووو

روعـــــــــــــــــــــــة بارك الله فيك

يسلموووووووووووووووو

يسلمووووووووووووووووووووووووووووووووووووووو