نصائح باليبى / بى أبيات من الشعر /خليك فاعل خير ىديمه /

خليك بين الناس فاعل خير

والعمر مهما طال راه قصير

.
.

خليك ديما صافي

كيف العسل للناس حلو وشافي

لا تهين غيرك لابشر تكافي

مهما حصلك من قلال الخير

ولا تخون من خانك وخلك وافي

ولا اتبيع حق الناس بالتزوير
.
.
لا اتكون شين طبايع

ولا اتكون مرخي في كلامك مايع

ولا اتعيش بين الناس حقك ضايع

ولا تكون قاسي عالضيف اتغير

وارحم اللي محتاج واللي جايع

وازرع الفرحه في قلوب الغير

.
.

راها الدنيا مالها ودادي

لايهمها كناس لا وزير

تبرم بعد زهوات جاي وغادي

بعد العلاوي تحدفك في بير

خلي كلامك ديمه

للناس خير وللعدوا تبسيمه

والحق ما يحتاج للتلويمه

واللي ظلم ما ينفعه تبرير

.
.

خليك صاحب ود

تراعي العداله والملامه عد

وين الزمان يخون لا ترتد

خليك على المبدا بلا تغير

ومهما علا نجمك وفوق صعد

تختم على حفره ويوم عسير

.
.

خليك ديما طيب

فزاع للصاحب ودوم قريب

لاتخون جارك لارفيق اتسيب

وقت الغيث خليك دوم كبير

والصقر ما ينزل منازل بومه

واللي بلا جنحان كيف يطير

والسبع ما يكل اللي مردومه

والحر ما يرضى العيب يدير

.
.

عالخير علّي ساسك

وخلي افعالك دوم هن حراسك

والبس اللي زينه اتكون مقاسك

والزم حدودك خير م التصغير

ورغم الكواين ما اتواطي رسك

ولا اتقول للي صار ليش اصير