قوم يا مصــــــــــري

قوم يا مصري
أنا أمك بأناديك
إمحي قهري
وأوعىَ لحظه أهون عليك
إسند لي ضهري
متشوَّقه تلمسني إيديك
كفايه عمري
حته منه ضاعت
وأنا بأنده عليك
إشعل لي ناري
بحريه تسري ف الهشيم
كفايه طُهري
إتعاص فساد
بإنحلال كان عظيم
إنتهكوا عرضي
دُقت مرّي
صفوا دمّي
وإنتَ مغمّي
عينيك تملّي
عن إغتصابي و عُري جسمي
و ربي هوَّ العليم
قوم يا مصري
رجع لي نظري
قوم و خلّي الصوت يلالي
يدوي يهز لي جبالي
تخرج ولادي م الشقوق
قوم و نادي
خلّي ولادي
تصمم على رجوع الحقوق
اللي ضاعت
اللي غارت
وإنتوا نايمين مالكومشي صوت
قوم وقدم المطالب
ده الحق لو ما ليه مُطالب
يضيع م الصمت و م السكوت
و خليك جريء و إنت تطالب
أو
أحسن ياولدي تروح تموت
لكن يامصري أمنتك أمانه
ما ترشق رئيسك بالمهانه
ده هوّه رمز للوطن
عدّا معاك برضه محن
فحوّد عن سكة الندامه
وإتعامل بالأصول والشهامه
مد إيدك للتفاهم
وخلّي بينكم السلام
وبقلب ما يكونشي ناقم
ولا حتى يسعىَ للإنتقام
ومهما تكون مشحون غضب
إبعد حبيبي عن الشغب
عن التخريب
عن الترهيب
و إرفع شعار الأدب
شايفاك بتشق داري
وإنت مقسوم نصين
لااا
لا حبيبي كون حضاري
و إرحم قلبي الحزين
قوم وقدم لي الحضاره
و إبعد ياولدي عن الإثاره
قوم بعقل ما يكونشي غايب
وإنتبه م اللي بيلعب بالعقول
إخزي كل شامت و فرّح الحبايب
و إمسح لي الدموع
كفايه حلقي مليان مراره
خايفه تنطلق الشراره
من فوضى عارمه ف الربوع
وياريت تنفع الدموع
بعد ما يفلت الزمام
ساعتها
قول ع الكل السلام
فإوعدني ياإبني بالحكمه والمهاره
نفكّر العالم
إن إحنا أرباب الحضاره
و في الختام
عايزه أرتاح و أنام
ف داويني ياإبني بالأمان والسلام
قوم يا مصري
آن الأوان
تبني لي قصري
و ترجّع للزمان عصري
بالحكمه و المحبه و الوئام
********