يامصرى أصحى وفوق

يا مصرى اصحى وفوق
وخلى عندك ذوق
طالت نومتك
وواعى تحضر وانت عايش دفنتك
اوعى تنام فى الخط
وتقول اللى عايزينة هيكون
وانت اية فى الكون
قوم واصحى واصرخ وقول كلمتك
وسمع العالم غنوتك
يا مصرى امتى هتتحرك
خمسين سنة صوتك بيتزور
يا مصرى اصحى وفوق
وخلى عندك ذوق
عمر التغير ما هايجى من فوق
لازم انت تتغير
اوعى تقول كدا رضا
وانت مش لاقى القوت
اوعى تقول عيشة واخرتها الموت
اوعى تقول احنا غلابة هنرحوا فين
واحنا فى بطن الحوت
اوعى تخاف من شومة او من نبوت
يا مصرى شمسك منورة
وانت مضلم
اتعلم من الشمس اتعلم
اوعى للظلم والذل والقهر تسلم
لسة فية امل بس انت اتكلم
قول دى بلدى بتموت قدامى
مقدرش يا ناس مقدرش اتحمل
انطق اصرخ اتكلم
اوعى تسمعلهم بيقولوا انجازات
على ورق لو تعرف الحقيقة قلبك ينحرق
هتفضل لحد امتى راضى ان بلدك تتسرق
اوعى تصدق كلامهم
ان البلد فقيرة
والناس كتيرة
طيب ما يسيبوا البلد
انما لا الاب بيجيب الولد
مش ناوى اعمل حاوى ولا اقول غناوى
واقولك بص لنص الكوب المليان
واحنا فى بلد الامن والامان
كل دة كلام فاضى
انا شايف البلد بتموت قدامى
عايش مدفون فى قبرى احلامى
مستنى صوتك فى منامى
مستنى صوتك فى منامى
اوعى تصدق انهم اشغال شقة فى حب البلد
هما اشغال شقة فى شفط البلد
الاب بيجيب الولد
وانت واقف صنم
ملكش اى دور
عايش طنبور
داحتى الطنبور بيدور
وبيروى الارض البور
بس لازم حد يدورا
ولو حتى واقف مزورع
اطرح فروع من نور
علشان نتغيروا
اوعى تصدق ان احنا بنتقدموا
من يوم ما بينينا الهرم
واحنا فى كبارى ونفق
وعايزينا قال اية نحلموا
لازم نحلموا ان احنا الاول نتغيروا
يا مصرى اصحى وفوق
وارفع راسك فوق
وخلى عند اهلك ذوق
نايم فى الخط من يوم حتحوت
ليوم الموت
وزى مارحت زى ما جيت
بس هاتتحاسب على السكوت
تعالى نغيروا شكلها
تعالى نرسموا بسمة تملأ وشها
بدل الدموع اللى ملية قلبها
تعالى انا وانت نغيروا شكلها
يا مصرى لية الخوف مموتك
يا مصرى اصحى وفوق وغير دنيتك
وسمع العالم غنوتك
اتظاهر اغضب اطلب حقك
اوعى تخاف من مسئول
المسئول اللى لازم يخاف منك
المسئول بيشتغل عندى وعندك
يا مصرى اصحى وفوق
وخلى عند اللى جابوك ذوق
طالت نومتك
اوعى تحضر وانت عايش دفنتك
اصرخ اتنفض قول كلمتك
يامصرى شمسك منورة
وانت مضلم
اتعلم من الشمس اتعلم
لسه فيه امل بس انت اتكلم
قول لا لتوريث لا للظلم لا للذل لا للفساد
لاللغاز لا للقهر لا للغدر لا للجلاد
ليه عايش ع الهامش
لازم تكون رقم
طول عمرك صفر وكأنه قدر
حس مره ان انت فى خطر
اوعى تكون لوح تلج وسط النار
البلد كل يوم بتنهار
عمرك يوم ما اخترت
ولا كان ليك اختيار
عمر ماحد عمل حسابك ولا حد خبط على بابك
من يوم ما اتولدت ليوم متموت
واعلى صوت عند جانبك
صوت السكوت

قصيده مميزه
يعطيك العافيه

مشكوررررررررة لمرورك الكريييييييييييييم

يسلمووووووووووووو

يسلمووووووووووووو